أول ميزة معانا في تحديث ويندوز 11 24H2 هي ظهور الإختصارات الأساسية

زي الCut والCopy في بداية قايمة السياق بدل ما كانت بتظهر سواء في أول أو نهاية القايمة بالشكل المصغر زي ما هو موضح بالصورة

windows 11 new context menu

دلوقتي شكلها بقى أكبر وواضحة أكتر وبالنسبالي دة أفضل وملفت للنظر أكتر .. بس أتمنى إنهم يخلوني أخصصها أو على الأقل أعيد ترتيبها براحتي وطبعاً دي حاجة مش هنشوفها بالساهل من مايكروسوفت.

تاني ميزة هي إقتراحات تقسيمات النوافذ Snap Layout Suggestions

لو كنت فاتح أكتر من تطبيق أو نافذة داخل الويندوز ووقفت بمؤشر الماوس هنا كدة هيقترحلك تقسيمات ذكية بسرعة بعرض أيقونة لشكل النوافذ النشطة .. ودة هيوفرلك وقت كبير عن إنك ترتبهم بشكل يدوي .. إنت بتعمل دة بضغطة واحدة بمجرد لمح البصر.

والتحديث دة كان مفروض ينزل مع إصدار 23H2 ولكن تم ترحيله ل24H2 وأدينا شوفناه.

تالت ميزة وهي إضافة الاسكرول في قايمة الكويك سيتينج Scrollable Quick Settings

قبل كدة كنت تفتح القايمة دي تشوف انت عاوز إيه من المتاح وتقفلها، دلوقتي فيه خيارات سريعة اتضافت للقايمة وبالتالي تقدر تسكرول أب أو تسكرول داون وتوصل للي انت عاوزه بسرعة، ومش بس كدة .. كمان بقا عندك قابلية إعادة ترتيب الإعدادات دي

ومش بس كدة .. مايكروسوفت ضافت زر ريفريش في شبكات الواي فاي عشان تبحث بسرعة عن الشبكات المتاحة في النطاق بتاعك

وقبل كدة كنت بتضطر تفصل الواي فاي وتشغله كإنك عملت ريفريش.

وبالمناسبة كان فيه حد سألني على صفحتي بالفيس بوك بالتعليقات عن ميزة توطية وتعلية الصوت عن طريق الاسكرول ويل لما تقف بالماوس على رمز السماعة إتضافت ولا لسة .. هي بالفعل متضافة من فترة كبيرة.

رابع ميزة بما إننا وقفنا عند الواي فاي .. فدلوقتي تقدر تشارك شبكة الواي فاي بتاعتك عن طريق QR code أو رمز الإستجابة السريع مع زمايلك وقرايبك .. عارف إنك مش هتعمل كدة أو إن دي حركة تقيلة على قلبك بس أهي ميزة إتضافت مكنش ينفع مقولكش عليها.

خامس ميزة وهي تغييرات في الصور المصغرة اللي بتكون في مدير المهام Taskbar

التصميم اتغير للأحسن شوية هنا وكمان شكل الأنيميشن لما تعمل سويتش من بالمنظر دة مكنش موجود قبل كدة، ولو كنت فاتح أكتر من تاب داخل الإكسبلورر كان قبل كدة بيعرض التاب النشطة بس في الصورة المصغرة، دلوقتي بيوضحلك إن فيه تابات تاني مفتوحة (الميزة موضحة بالفيديو).

الميزة السادسة وهي ميزة الذكاء الإصطناعي لـ Copilot وهنجربه شوية ونضحك ونهزر معاه ونشوف مدى ذكاؤه الإصطباحي

اتكلمت معاكم قبل كدة عن إن مايكروسوفت بتتجه للإعتماد على الذكاء الإصطناعي عن طريق كو بايلوت داخل الويندوز وقولتلكم هنشوف تطوير كبير في الموضوع دة الفترات الجاية إن شاء الله ومش بس مع كو بايلوت دة في تطبيقات كتير داخل الويندوز .. خلونا نلقي نظرة كدة

أول ما هتثبت تحديث 24H2 هتلاحظ إن كوبايلوت موجود أقصى اليمين تحت جنب الساعة في مكانه الطبيعي ولسة مكتوب PRE اللي هي نسخة Preview أو المعاينة يعني

جربت اديله شوية أوامر باللغة الانجليزية نفذها .. زي تغيير شكل السيستم للدارك مود، وطلبت منه تحميل متصفح جوجل كروم .. فتحلي صفحة التحميل فعلاً ومن الموقع الرسمي لجوجل، ودة كويس بدل ما ادخل ابحث عن تحميل برنامج معين ويجيبلي مواقع مشبوهة

قولتله إديني شوية معلومات عن Copilot .. اداني حبة معلومات حلوة وكل دة باللغة الإنجليزية طبعاً، جربت اسأله سؤال بالعربي : من هو النبي محمد صلى الله عليه وسلم

بالفعل جاوب عليا باللغة العربية الفصحى إن النبي محمد صلى الله عليه وسلم أحد أعظم الشخصيات في التاريخ

ولكن أنا بس هصحح حاجة إنه صلى الله عليه وسلم مش أحد أفضل، هو بالفعل أفضل شخص على مر التاريخ لحد ما تقوم الساعة، وكملي باقي المعلومات الأساسية زي نسبه ومهنته وبعثته وفي النهاية بيديني شوية مقترحات لمواضيع متعلقة بالحاجة اللي بحثت عنها وتفاصيل أكتر

هتلاحظ إن إتضاف تحت هنا علامتين خاصين بالصور، سواء تحط أي صورة عندك أو تآخد سكرين شوت ع طول، فانا جربت اخد سكرين شوت واضيف عليها اي حاجة كدة وطلبت منه يحولهالي لصورة متحركة .. كنت عاوز أشوف بيتصرف إزاي يعني، قالي سأحاول إنشاء ذلك .. انا فكرته بيكتب سأحاول إن شاء الله

طوِّل شوية وفي النهاية قالي روح لImage Creator عشان صورتك معقداني والصراحة عنده حق، فتح لي شوية صور ملهاش علاقة بالصورة اللي وريتهاله ولكن دة مكنش منطقي ليه

جربت اخد سكرين شوت وانسخها فيه .. الصورة اتحطت بالفعل، وسألته مين اللي في الصورة دة ،مقدرش عليا قولت يمكن النص اللي في الصورة عامله أزمة فخدت سكرين شوت تانية بدون اظهار أي نص، ولكنه اعتذرلي حفاظاً على الخصوصية بتاع الصورة، ودة مكنش لصورتي بس

جربت صورة الشيخ محمد متولي الشعراوي بردو نفس الكلام، فهو بيعتبر الصور حاجة خاصة ملوش فيها، جربت أتحايل عليه في السؤال دة وقولتله هو دة الشيخ الشعراوي؟ طلع ذكي وجاوب نفس إجاباته السابقة

قولت أما احطله صورة لنظام ويندوز 95 كدة ولكنه عاملها نفس المعاملة، بس من ضمن الروابط المقترحة قدرت اتعرف ع اللي انا عاوزه، فجه في بالي أقوله افتحلي قناة احمد الجرنوسي بالعامية كدة أشوفه هيفهمني ولا لازم لغة عربية فُصحى بالفعل عرفهالي وعرضلي لينكات قناتي، وفتحلي قناة حد تاني معرفوش مع كامل الاحترام ليه طبعاً بس مكنش ليه علاقة بيا  معرفش عرضه على أي أساس

قولتله تقدر تقفلي الكمبيوتر الساعة 7 مساءاً ؟ فهو مفهمنيش أوي وفكرني بسأله عن طريقة تغيير الوقت وعرضلي الطريقة بشكل مفصل

طلبت منه إزاي أظهر أيقونة الكمبيوتر على سطح المكتب؟ بالفعل وضحلي الطريقة وكمان بعض الشروحات المصورة من بعض المواقع زي موقع علمني دوت كوم والموقع الرسمي من مايكروسوفت.

أعتقد هيتظبط ويتطور قدام شوية إن شاء الله وهبقى أعملكم فيديو لوحده بردو عن كو بايلوت لو عاوزين اكتبولي من خلال التعليقات.

الميزة السابعة وهي الذكاء الإصطناعي في تطبيق paint أو زي ما بنقول عليه في مصر من أيام ما وزارة العدل كان إسمها وزارة الحقانية .. برنامج الرسام

الذكاء الاصطناعي ببرنامج الرسام

مع إضافة Cocreator تقدر تكتبله وصف معبر عن صورة هو هيتخلها ويرسمها بتأثيرات مختلفة

ميزة إزالة الخلفية للصور أو تحويله لصيغة PNG المفروض إنها اتحسنت تعالوا كدة سريعاً نجربها مع بعض

دي نتيجة الإزالة إلى حد ما مرضية ولكن كل ما كان العنصر واضح ومفصول عن ألوان الخلفية كل ما كان القص أفضل بكتير زي الصورة دي شايفين حذف الخلفية بالمسطرة إزاي، وصورة زي دي عشان الالوان في الخلفية متقاربة شوية مع العنصر المحبوس مقدرش يفصلها كويس، وبفكركم بالLayers دي عشان لو هتضيف حاجة فوق الصورة تكون في لاير لوحدها (كل التفاصيل موضحة بالفيديو أعلاه).

الميزة التامنة وهي AI Cowriter في تطبيق Notepad

دلوقتي تقدر تعيد كتابة محتوى في تطبيق النوت باد وتغير الفورمات وتعدل في كتابة الفقرات بحيث تخليها أطول أو أقصر زي ما تحب

ولو حددت على أي كلمة أو جملة في النص داخل النوت باد تقدر تحولها على طول لـ كو بايلوت عشان يتعامل هو بدل ما تنسخها وتلزقها

لاحظ كدة الأنيميشن اللي بيحصل في أيقونة كوبايلوت لما بيتم نسخ النص في النوت باد، ولو نسخت صورة من الفايل إكسبلورر لاحظ الأنيميشن هنا بدل شكل القلم بقا على شكل صورة في الكوبايلوت.

تاسع ميزة في تحديث ويندوز 11 24H2 وهي ميزة الLive Captions

Live Captions windows 11 24h2

ودي للي أول مرة يسمع عنها عبارة عن نص أو ترجمة لأي فيديو انت بتشغله داخل الويندوز باللغة الإنجليزية فقط قبل كدة، دلوقتي ضافوا عدة لغات ولكن لسة مضافوش اللغة العربية بس متوقع إضافتها في التحديثات الجاية إن شاء الله، والجديد فيها إنها بقت تدعم مكالمات الصوت أو الفيديو المباشرة.

عاشر ميزة هي دقة الذكاء الاصطناعي الفائقة AI Super Resolution

ودي ميزة مدعومة بالذكاء الإصطناعي بتستخدم حاجة إسمها NPU أو وحدة المعالجة العصبية المدمجة لرفع مستوى الدقة في الألعاب .. حاجة كدة شبه تقنية AMD FSR و Nvidia DLSS بس طبعاً لسة نحكم عليها لما نجربها إن شاء الله

وطبعاً مش كل الألعاب .. الألعاب المدعومة فقط

وفي حالتي هنا ملقتهاش ظاهرالي ، اللي ظهرلي فقط هو خيار الأوبتيمزاشن دة ومكنش موجود قبل كدة .. ولكن دي صورة موضح فيها خيار الAutomatic Super Resolution

وأكيد في بعضِ منكم استغرب مصطلح NPU اللي لسة قايله، دة بكل بساطة حاجة بتشبه راس الإنسان .. مش راس أبو الروس، فجسم الإنسان بيقدر يستشعر أي تنبيه وينقل الإشارات ويدي إنذار من خلال الجهاز العصبي

الراس أو الدماغ البشرية هي المسئولة عن تجميع كل دة من الأعضاء الحسية وتقييم الوضع الحالي وبالتالي إصدار الأوامر عن طريق الاشارات اللي بتتبعت للمخ

فربنا مخلقش كل دة وخلاص .. كل صغيرة وكبيرة أكيد ربنا عمل حسابها .. ” صنع الله الذي أتقن كل شيء إنه خبيرٌ بما تفعلون “

“الذي أحسن كل شيءٍ خلقه وبدء خلق الإنسان من طين” .. وييجي واحد أصله حيوان منوي مكون من راس وعنق وديل يقولك الإنسان أصله قرد .. سبحان الله

عموماً دي كلها تفاصيل مقدرش أخوض فيها أكتر من كدة لإني مش دارس طب ولكن بحاول أبسطلكم مصطلح NPU قدر الإمكان

فNPU أو وحدة المعالجة العصبية للكمبيوتر دي تقدر تعتبرها شريحة ذكاء اصطناعي بتقدر تتعلم وتاخد قرارات بنفسها بناءاً على بيانات متراكمة لا حصر لها

فبتتعامل معاها وبتحللها عشان تقدر تآخد قرارات زي الجهاز العصبي في جسم الإنسان .. ابقوا اقروا عنها كتير.

الميزة الـ11 وهي تحسين الصوت بالذكاء الإصطناعي AI Voice Clarity

تحسين الصوت دي كانت جزء من أجهزة Surface لبعض الوقت ولكن مايكروسوفت هتخليها لكل الأجهزة اللي عليها نظام ويندوز بدءاً من إصدار Win11 24H2

ومن إسمه فهو بيقلل الوش في الخلفيةفي مكالمات الصوت أو الفيديو باستخدام وحدة NPU اللي لسة متكلمين عليها ودة عنر طريق الذكاء الاصطناعي.

الميزة الـ12 ميزة Sudo اللي هتفرح بالأخص محبين نظام لينكس وبيشتغلوا بردو على ويندوز

لو فتحت ويندوز باور شيل وكتبت أمر سودو هيقولك لازم تفعلها من خلال إعدادات المطورين في الويندوز، ودي بتديلك صلاحيات إضافية كمستخدم احترافي للويندوز عن طريق بعض الاوامر اللي ممكن تستعملها في الكوماند برومت

الميزة الـ13 مايكروسوفت حدثت رمز الـEnergy Saver أو توفير الطاقة لأجهزة اللاب توب وأجهزة الديسكتوب بالشكل اللي قدامكم دة

ولو استعملت شاحن بطيئ أو مش مدعوم للاب توب بتظهرلك علامة تعجب كتنبيه عشان تاخد بالك، وبقا فيه أوبشن اسمه Always Ues Energy Saver لو حبيت تشغله على طول عشان تحافظ أكتر على عُمر بطارية اللاب توب بتاعك.

الميزة الـ14 لو ضغطت كليك يمين على مجموعة ملفات او فولدرات هتلاحظ خيار جديد لضغطهم بامتدادات مختلفة سواء zip أو 7z أو tar بإعدادات تقدر تخصصها بشكل أكبر كمان

في الإصدار الحالي مبيديلكش غير الضغط لـZIP file بس، ومتنساش إنك تقدر تفتح الملفات المضغوطة في التحديث الحالي أصلاً.

الميزة الـ15 في تحديث ويندوز 11 24H2 لو خدت لقطة للشاشة عن طريقة أداة سنيبينج توول ضافوا أشكال زي السهم والدايرة والمستطيل عشان لو هتحدد او تُشير لحاجة معينة في الصورة ودي لقيتها موجودة لو خدت سكرين شوت من خلال كو بايلوت لكن موصلتش لسة للsnipping tool عندي.

الميزة الـ16 لو رحت للaccebility واخترت ماوس بوينتر آند تاتش هتلاحظ خيار جديد اسمه pointer indicator فدة بيخلي الماوس واضح أكتر ودي ميزة كويسة جداً لضعاف النظر ربنا يعافيهم ويتم شفاهم على خير ويشفي كل مريض.

آخر ميزة بقا هي حلوة ومضحكة في نفس الوقت

وهو تغيير شكل نوافذ إعدادات التثبيت لويندوز 11 طبعاً أنا لما نزلت الأيزو وثبتها ولاحظت التغير دة صورت عملية التثبيت على طول عشان أشاركها معاكم

فالحلو هنا هو إني كنت دايماً اسأل نفسي ليه مايكروسوفت مغيرتش الشكل التقليدي في عملية التثبيت دي من ساعة ويندوز 8 تقريباً، ومضحك لإنها بقالها حوالي 12 سنة أو أكتر مستمرة على نفس الشكل في كل النسخ اللي جت بعد ويندوز 8 ، واحد هيقولي هو تثبيت ولا بحلقة يعني يا عم جرنوسي .. ما طالما النسخة بتتثبت معاك يبقى سو وات أنا مش هرد عليك عشان سو وات دي وخليني أقولك إيه هي متطلبات تشغيل الإصدار دة

متطلبات تشغيل ويندوز 11 24H2 هي هي نفس متطلبات التشغيل المعروفة لويندوز 11

• معالج من الجيل الثامن أو اعلى لإنتل .. أو يعني من إصدار سنة 2018 سواء إنتل أو AMD.

• رامات 4 جيجا بايت ع الأقل .. وTPM2.0 وتفعيل السيكيور بووت.

• ومع ذلك تقدر تتخطى المتطلبات دي كلها وتشغله لو كان معالجك من 2011 أو أكتر .. بس طبعاً منصحش بدة.

• ولكن فيه طرق كتير لتخطي مواصفات التشغيل الموصى بها لو حابين أشاركها معاكم اكتبولي من خلال التعليقات.

ملحوظة: لو معاك معالجات قديمة جداً زي إنتل كور تو ديو فمش هيشغل Win11 24H2 للأسف عشان موضوع الذكاء الاصطناعي وممكن ابقى أحاول أجرب دة على جهاز قديم واشارك معاكم التجربة بردو إن شاء الله

وقبل ما اختم خليني أقولك إن الفترة اللي فاتت كان انتشرت إشاعة ويندوز 12 في كل مكان تقريباً وكذا حد كان بيسألني ننزل ويندوز 12 ولا نستنى شوية؟ وكان ردي إزاي أصلاً فيه ويندوز 12 .. كلها مجرد إشاعات وبعض الناس بتستغل الإشاعات وممكن يلبسوكم في الحيط صدقوني، حتى الرئيس التنفيذي لشركة كوالكوم كان متوقع صدور ويندوز 12 في سنة 2024 وأهو لا طلع فيه صدور ولا حتى وراك !

ومايكروسوفت نفسها ما أعلنتش بأي شكل من الأشكال عن أي إصدار لويندوز 12 وأهي صدمتنا من كام يوم بالإعلان عن التحديث الجديد لويندوز 11 24H2 اللي هنشوفه السنادي أكيد إن شاء الله ومش معنى كدة إن مش هيكون فيه ويندوز 12 .. أنا شخصياً بتوقع إصداره زي ما قولتلكم آخر السنادي أو أول السنة الجاية بالكتير إن شاء الله ودة لإن مايكروسوفت لسة. بتطبخله وبتسويله على نار هادية بس هانت وإعداداتها بانت

طيب تنصحنا نحمل الإصدار دة ونشتغل عليه ولا لأ ؟

إجابتي كالعادة بما إنها لسة نسخة في مرحلة التطوير ومنزلتش بشكل نهائي بلاش إلا إذا كنت عاوز تجرب وتشوف كل حاجة بنفسك من باب التجربة مش أكتر ومش شرط تلاقي كل حاجة شوفتها بالفيديو ظهرتلك .. فيه مزايا بتظهر بشكل تدريجي، ومبنصحش أبداً بالإعتماد على إصدارات ويندوز إنسايدر .. لإن الإصدارات دي بتكون في مرحلة التطوير ومبتكونش مستقرة بشكل كبير .. واللي عاوزها فهي متاحة بشكل مباشر على قناة Canary و Dev حمل أي واحدة فيهم لو حبيت تجرب.

وفي النهاية دة رابط تحميل ويندوز 11 24H2 بصيغة iso ادخل واختار اللغة المفضلة ليك ومتنساش اللايك الجميل والشير المتين وتتابعني على انسجرام وتيك توك بنزل فيديوهات قصيرة حلوة متفوتكش، وأشوفكم على خير إن شاء الله .. سلام عليكم.